Pse Ronaldo merr më shumë kritika se Messi në Kupën e Botës?

DOHA — Cristiano Ronaldo vazhdon të jetë një nga figurat më të komentuara në futbollin botëror, edhe pse është pjesë e Kupës së Botës 2026. Ish-bashkëlojtari i tij te Manchester United, Louis Saha, ka shpjeguar pse portugezi merr më shumë kritika se Lionel Messi.

Ronaldo, 41 vjeç, po luan në Kupën e tij të gjashtë. Ai ka shënuar tre gola në këtë turne, përfshirë një penallti vendimtare në fitoren 2-1 të Portugalisë ndaj Kroacisë në fazën e 1/16. Megjithatë, pavarësisht kontributit, kritikat ndaj tij nuk kanë munguar.

Ndryshe nga Messi, i cili ka marrë lavdërime për gjashtë golat e shënuar dhe kryeson garën për "Këpucën e Artë", Ronaldo vazhdon të përballet me debate rreth rolit të tij në formacionin titullar. Sipas Sahas, arsyeja qëndron në mënyrën se si Ronaldo e prezanton veten publikisht.

"Ronaldo flet më shumë se Messi dhe pretendon më shumë se Messi. Njerëzit priren ta mbrojnë dikë që duket më i tërhequr apo më i brishtë. Messi është më i qetë dhe për këtë arsye duket më i mbrojtur," tha Saha për GOAL. "Ronaldo nuk kërkon mbrojtje, prandaj edhe nuk e merr atë."

Ish-sulmuesi francez shtoi se Ronaldo ekspozon veten më shumë kur thotë hapur se është më i miri. "Ai del përpara dhe thotë: 'Unë jam më i miri'. Disa njerëz nuk e pëlqejnë këtë. Me Messin nuk ndodh njësoj," vuri në dukje Saha.

Pas paraqitjes me dy gola kundër Uzbekistanit, Ronaldo kishte pranuar se java ishte e vështirë për të dhe për skuadrën. "Mund t’ju them se ishte një javë shumë e vështirë, me shumë kritika ndaj nesh. Kur gjërat shkojnë mirë, Cristiano është i mirë; kur shkojnë keq, ai është i pensionuar, është i vjetër," kishte thënë ai.

Portugalia mbetet në garë për trofeun, pas fitores ndaj Kroacisë. Skuadra e Roberto Martinezit do të përballet me Spanjën në një duel të zjarrtë iberik në fazën e 1/8.

Burim: Insajderi
— Redaksia ZHURMA