Pse prania e Lena Wurzenberger po shkakton trazira në kampin e Gjermanisë?

KAROLINË E VERIUT — Përgatitjet e kombëtares gjermane për Kupën e Botës në Karolinën e Veriut po shoqërohen me tensione të papritura jashtë fushës. Vëmendjen kryesore nuk e kanë marrë partneret e futbollistëve, por e dashura e trajnerit Julian Nagelsmann, Lena Wurzenberger, prania e vazhdueshme e së cilës po shkakton trazira në kamp.

Sipas gazetës “Bild”, ish-gazetarja 34-vjeçare është bërë një figurë tejet e dukshme në stërvitje, duke tejkaluar çdo partnere të mëparshme të trajnerëve të Gjermanisë. Ajo po ndjek çdo hap të skuadrës që nga kampi fillestar në Frankfurt, ku vëzhgonte seancat nga ballkoni, e deri te prania në hotelin e ekipit.

Ndërsa gjermanët përgatiten për ndeshjen e të shtunës kundër Bregut të Fildishtë, pas fitores 7-1 ndaj Curacaos, Wurzenberger ka qëndruar në fushë pranë lojtarëve rezervë. Ajo u pa duke udhëtuar me biçikletë bashkë me Nagelsmann drejt qendrës stërvitore dhe pritet të ulet direkt pas stolit në Toronto.

Ky afrimitet ka krijuar shqetësime te lojtarët, të cilët ndiejnë se nuk mund të flasin lirshëm apo të shprehin mendimet për trajnerin gjatë ngrënies së vakteve. Ndjesia se partnerja e trajnerit dëgjon bisedat e tyre të tavolinës po ndikon në atmosferën dhe harmoninë e brendshme të grupit.

Edhe legjenda Lothar Matthaus e ka kritikuar këtë situatë për televizionin vendas, duke thënë se kjo nuk është ideale. Sipas tij, partnerja e trajnerit nuk duhet të shfaqet kaq shpesh në foto dhe të jetë pjesë e përditshmërisë së skuadrës gjatë një turneu kaq të rëndësishëm.

Burim: Insajderi
— Redaksia ZHURMA