Pse nxënësit dhe prindërit e quajnë Testin e Arritshmërisë 'humbje kohe'?

PRISHTINË — Rreth 23 mijë nxënës të klasës së nëntë iu nënshtruan të premten Testit të Arritshmërisë, por shumë prej tyre dhe prindërit e konsiderojnë atë të panevojshëm dhe si një ngarkesë shtesë.

Nxënësit kanë shprehur se testimi nuk i ndihmon në orientimin për shkollimin e mesëm, por përkundrazi, shton presion në një periudhë tashmë të vështirë. "Na është dukur pak e vështirë, sepse kemi pasur mësime të shkollës, pastaj kemi mësuar vazhdimisht për Testin e Arritshmërisë," ka thënë një semimaturante.

Disa nxënës e kanë përjetuar testin si humbje kohe, veçanërisht kur krahasohet me detyrat e rregullta shkollore dhe provimet gjatë vitit. "Pak ngarkesë po, ama humbje kohe ma shumë sepse kemi pasur edhe teste në shkollë," ka deklaruar një tjetër nxënës.

Përveç ngarkesës, disa nxënës kanë kritikuar edhe kushtet e testimit, duke e quajtur procesin të padrejtë. "Pak është padrejtësi sepse ne nuk kemi pasur mundësi të kopjojmë, sepse e kemi pasur arsimtaren e vështirë e ata tjerët ndoshta kanë pasur mundësi," ka thënë një nxënëse.

Këshilli i Prindërve ka deponuar kërkesë në Ministrinë e Arsimit për heqjen e testit, duke argumentuar se ai nuk pasqyron performancën reale të nxënësve gjatë viteve. "Ngarkesa e shtuar për nxënësit në fund të ciklit të arsimit të mesëm të ulët, diskrepancë e rezultateve të testit me performancën reale," ka shpjeguar Linda Dula-Halilabazi, nënkryetare e Këshillit.

Prindërit propozojnë që pranimi në shkolla të mesme të larta të bazohet 50% në suksesin e përgjithshëm të nxënësit nga klasa e gjashtë deri në të nëntën, dhe 50% në rezultatet në lëndë të veçanta. Megjithatë, Ministria e Arsimit ka vendosur që testi të mbetet edhe këtë vit, duke premtuar shqyrtim për vitin e ardhshëm.

Testi u zhvillua me rreth 23 mijë nxënës në të gjithë Kosovën, por edhe këtë vit, përmbajtja dhe përgjigjet u publikuan në rrjetet sociale, duke rritur kritikat për transparencë dhe vlerësim.

*Burim: Koha.net*
*— Redaksia ZHURMA*