Pse Kosova po izolon veten nga korridoret e gazit amerikan?
A është pavarësia energjetike vetëm çështje ekonomike, apo edhe domosdoshmëri gjeopolitike?
PRISHTINË — Anëtari i Kryesisë së PDK-së, Enver Hoxhaj, ka kritikuar ashpër qasjen e Qeverisë Kurti ndaj projekteve energjetike, duke e akuzuar se vendimet e saj po e izolojnë Kosovën nga korridoret e gazit amerikan.
Hoxhaj reagoi pas deklaratës së ministres në detyrë të Ekonomisë, Artane Rizvanolli, e cila tha se strategjia energjetike e vendit bazohet në burimet vendore dhe teknologjitë më të favorshme ekonomikisht. Sipas tij, refuzimi i gazit amerikan nuk është vetëm një gabim ekonomik, por edhe një rrezik gjeopolitik.
"Me 2019, Qeveria Kurti anuloi projektin me ContourGlobal. Me 2021, refuzoi projektin amerikan të gazit të mbështetur nga SHBA. Sot, po refuzon edhe një mundësi tjetër për t’u kyçur në korridoret e gazit amerikan, duke u rikthyer te qymyri," shkroi Hoxhaj në Facebook. Ai theksoi se pavarësia energjetike është domosdoshmëri për të mbajtur angazhimin amerikan në Kosovë.
Sipas Hoxhajt, të gjitha vendet e Ballkanit dhe Evropës kanë kuptuar këtë, përfshirë Serbinë, e cila po lidhet me korridoret e gazit të lëngshëm (LNG). "Kosovës nuk i duhen arsyetime pse nuk lidhet me gazin amerikan. I duhet vizion dhe vendimmarrje strategjike," përfundoi ai.
Burim: Klan Kosova
— Redaksia ZHURMA