Pse asistenti i votuar në Senatin e UP-së është bashkëautor me kryetarin e komisionit?
Naser Kabashi, kryetar i komisionit vlerësues, është bashkëautor edhe me Muratin në punimet shkencore me të cilat ky i fundit aplikoi.
PRISHTINË — Ylli Murati u votua asistent në Universitetin e Prishtinës në fund të prillit 2026, ndërsa kryetari i komisionit vlerësues, Naser Kabashi, figuron si bashkëautor në të gjitha punimet shkencore me të cilat aplikoi Murati.
Murati mori 76 pikë në vlerësim. Kundërkandidati Mazllum Kamberi u vlerësua fillimisht me 62.49 pikë, të cilat u korrigjuan në 65.49 pas një "lëshimi teknik", sipas raportit të komisionit të datës 2 qershor 2026.
Kamberi e quan procesin "proces me shumë parregullsi serioze përgjatë gjithë rrjedhës, nga raporti vlerësues e deri te vendimi i Senatit të UP-së." Ai thotë se ka publikime si autor i parë dhe autor korrespondent, ndërsa Murati, sipas raportit të komisionit, nuk figuron si autor i parë në asnjë prej tyre.
Për lidhjen mes kundërkandidatit dhe kryetarit të komisionit, Kamberi thotë: "Duke pasur parasysh këto parregullsi dhe duke parë ndërlidhjen e drejtpërdrejtë akademike e profesionale ndërmjet kundërkandidatit dhe kryetarit të Komisionit Vlerësues, kjo çështje merr dimension edhe më serioz dhe krijon dyshim të arsyeshëm se kjo ndërlidhje mund të ketë ndikuar në procedurë."
Komisioni vlerësues u përbë nga Kabashi si kryetar, si dhe nga profesorët Cenë Krasniqi dhe Vlora Shatri. Konkursi u hap më 8 janar 2026 për pozitën nr. 4 të asistentit në Fakultetin e Inxhinierisë së Ndërtimit (FIN), mes lëndëve të tjera për Teknologjinë e Betonit dhe Fizikën e Ndërtimit.
Sipas raportit, Murati u favorizua për rezultate të mira, notë mesatare më të lartë se kandidatët e tjerë, tre vite angazhim në UP dhe studime doktorature në Portugali. Për Kamberin, komisioni konstatoi notë mesatare më të ulët, mungesë angazhimesh të mëhershme në mësimdhënie dhe studime doktorature në Universitetin Sv Kiril dhe Metodij në Shkup.
Në konkurs aplikoi edhe një kandidat i tretë, i cili sipas komisionit nuk i plotësoi kushtet bazë, "sepse nuk ka shkollim adekuat për lëndët e shpallura në Konkurs."
Burim: Kallxo
— Redaksia ZHURMA