Pse Albin Kurti po e refuzon gazin amerikan sipas profesorit Shkumbin Misini?

PRISHTINË — Profesori universitar, Shkumbin Misini, ka deklaruar se refuzimi i deritanishëm i projektit të gazit amerikan nga Qeveria e Kosovës rrezikon sigurinë kombëtare. Sipas tij, ky projekt do të garantonte pavarësinë energjetike të vendit dhe do të shmangte varësinë e kushtueshme nga importi i energjisë.

Gjatë një interviste në emisionin "EURO n’T7", Misini kritikoi kryeministrin Albin Kurti për orientim komunist. Profesori argumentoi se refuzimi i një projekti madhor të Shteteve të Bashkuara të Amerikës është i pakuptueshëm për një shtet si Kosova, që është vetë produkt i mbështetjes amerikane.

Misini vuri në dukje se derisa shtetet më të zhvilluara të BE-së dhe NATO-s në mbledhjen e fundit të G7-ës i nënshtrohen kërkesave të SHBA-së, Kosova i refuzon ato. Sipas tij, mungesa e një alternative serioze për projektet amerikane po e çon qeverinë drejt izolimit ndërkombëtar.

Profesori shprehu skepticizëm për aftësitë e kryeministrit për të zgjidhur këtë krizë. Ai theksoi se Kurti, i cili është lavdëruar si student i shkëlqyer dhe inxhinier i elektros gjatë kohës në opozitë, pas shtatë vjetësh në pushtet ende nuk ka arritur të sigurojë rrymë të mjaftueshme.

Ndërsa vendet e rajonit po përparojnë me energjinë e ripërtëritshme, bizneset dhe qytetarët lokalë po përballen me vështirësi të përditshme për shkak të dështimit për të gjetur një zgjidhje të qëndrueshme.

Burim: Gazeta Express
— Redaksia ZHURMA