Protesta në Tiranë: Pse organizatorët presin mërgatën pa kthim?
Në ditën e 20-të të tubimeve, aktivistët paralajmërojnë mbërritjen e qytetarëve nga diaspora për t'u bashkuar me kërkesat për largimin e qeverisë.
TIRANË — Qytetarët janë mbledhur edhe sot në Sheshin Skënderbej, duke shënuar ditën e 20-të të protestës së tyre në kryeqytet, raporton TopChannel. Pas grumbullimit fillestar në shesh, protestuesit kanë vijuar marshimin e tyre drejt Kryeministrisë, ku me pankarta në duar, thirrje përmes megafonëve dhe fjalime të shkurtra kanë adresuar kërkesat e tyre ndaj qeverisë.
Gjatë protestës janë lëshuar thirrje edhe ndaj opozitës për qëndrimet e saj. Organizatorët e këtij tubimi kanë theksuar gjithashtu se gjatë këtyre ditëve nuk është lejuar në asnjë moment pjesëmarrja apo afrimi i figurave politike në tubimin e organizuar në kryeqytet.
Një nga organizatorët e kësaj proteste, aktivisti Arben Kola, deklaroi se protestës pritet t’i bashkohen edhe qytetarë të tjerë. Tashmë kur po mobilizohet diaspora, Kola u shpreh se pjesëtarët e mërgatës kanë prerë biletë pa kthim për të ardhur në Shqipëri.
Burim: Portalb
— Redaksia ZHURMA