Si po goditen turizmi dhe investimet nga 25-ditësh protesta?

TIRANË — Kryetari i Bashkimit Demokratik për Integrim, Ali Ahmeti, i shqetësuar për pasojat ekonomike, deklaroi se protestat 25-ditëshe në Tiranë po shkaktojnë "dy goditje të forta" për vendin. Ai vlerësoi rolin historik të Shqipërisë për shqiptarët në rajon, veçanërisht për Kosovën, duke theksuar nevojën për stabilitet.

Ahmeti veçoi turizmin si një ndër shtyllat kryesore të ekonomisë shqiptare, duke theksuar se mund të ndikohet negativisht nga pasiguria që krijohet jashtë vendit. Protestat 25-ditëshe, sipas tij, janë nisur të dëmtojnë imazhin e vendit në jashtësi dhe, në këtë mënyrë, kërcënojnë ardhjet nga të huajt.

Goditja e dytë prek investimet, sipas Ahmetit. "Po goditen investimet e huaja dhe vendore. Asnjë investitor nuk rrezikon kapitalin e tij aty ku ka pasiguri," deklaroi kreu i BDI-së. Ai vlerëson se tensionet dhe pasiguria mund të frenojnë planet e zhvillimit ekonomik të vendit për vitet në ardhje.

Ahmeti theksoi se nuk po mbron figura politike të caktuara, por interesat e vërteta të Shqipërisë, duke paralajmëruar se zhvillimet aktuale do të ndikojnë jo vetëm në ekonominë shqiptare, por edhe në pozicionin e shqiptarëve në të gjithë rajonin. Mbrojtja e stabilitetit dhe zhvillimit, sipas tij, është e rëndësishme për të gjithë.

Burim: Sinjali
— Redaksia ZHURMA