Çfarë kërkon Prokuroria e Romës për vrasësin e Ilaria Sulës?
Mark Antony Samson akuzohet se e vrau ish-të dashurën, e futi në valixhe dhe e hodhi në humnerë në Capranica Prenestina.
ROMË — Prokuroria e Romës ka kërkuar dënim me burgim të përjetshëm për Mark Antony Samson, të akuzuar për vrasjen brutale të ish-të dashurës së tij, Ilaria Sula. Sipas akuzës, ngjarja ndodhi në mars të vitit të kaluar në apartamentin e Samson në Romë.
Hetimet zbuluan se Samson e kishte thirrur Ilariën në banesë, ku fillimisht e kishte dhunuar fizikisht dhe më pas e kishte goditur tri herë me thikë në qafë. Pas krimit, ai dyshohet se e futi trupin e pajetë në një valixhe dhe e hodhi në një humnerë në zonën e Capranica Prenestina.
Gjatë seancës në sallën bunker të burgut Rebibbia, prokurori Giuseppe Cascini e cilësoi krimin të planifikuar dhe të ekzekutuar "me gjakftohtësi", duke e quajtur të akuzuarin "manipulues, hipokrit dhe të mësuar me gënjeshtra". Prokuroria ngriti akuza për vrasje me paramendim, motive të ulëta dhe fshehje të kufomës.
Në sallë ishin të pranishëm prindërit e viktimës, Flamur dhe Gezime Sula. "Nesër do të ishte ditëlindja e Ilarias. Burgimin e vërtetë të përjetshëm e kemi ne", u shprehën ata mes lotësh.
Burim: Zëri
— Redaksia ZHURMA