Sa kërkesa të diasporës refuzoi KQZ për votimin me postë?
Pothuajse 11 mijë aplikime u refuzuan, ndërsa votimi me postë fillon më 25 maj.
PRISHTINË — Komisioni Qendror i Zgjedhjeve ka përmbyllur shqyrtimin e aplikimeve për regjistrim të votuesve jashtë Kosovës për zgjedhjet e parakohshme parlamentare, duke aprovuar 131,800 kërkesa nga gjithsej 142,803 të pranuara.
Zëdhënësi i KQZ-së, Valmir Elezi, njoftoi se 10,907 aplikime janë refuzuar dhe 96 të tjera janë anuluar. Shumica e votuesve të aprovuar — 100,522 — kanë zgjedhur të votojnë përmes postës, duke dërguar fletëvotimin në kutinë postare jashtë Kosovës. 27,776 të tjerë do të votojnë fizikisht në përfaqësitë diplomatike, ndërsa 3,502 do të dërgojnë fletëvotimin në kutinë postare të KQZ-së në Kosovë.
Votimi me postë do të zhvillohet nga 25 maji deri më 6 qershor. Votimi në përfaqësi diplomatike organizohet po ashtu më 6 qershor, një ditë para zgjedhjeve.
Burim: RTV21
— Redaksia ZHURMA