Projektligji i ri i qeverisë ndryshon financimin e kulturës
Institucionet publike të artit pritet të mbajnë 90% të të ardhurave të tyre.
Redaksia ZHURMA · · 2 min lexim
Ligji i vitit 2010 për artin dhe kulturën pritet të ndryshojë përmes një nisme të hartuar nga Ministria e Turizmit, Kulturës dhe Sportit, e cila synon t'u japë institucioneve publike më shumë autonomi profesionale dhe artistike. Ndryshimet parashikojnë që institucionet kulturore të mbajnë 90% të të ardhurave të gjeneruara, nga 30% që përfitojnë aktualisht, për t'i përdorur në produksione të reja dhe mbështetjen e artistëve.
Zëvendësministrja e Kulturës, Lira Pipa, u shpreh se kjo masë krijon fleksibilitet në program dhe mundësi për honorare më të larta. «Kjo krijon një tjetër fleksibilitet në programin, duke mundësuar produksione edhe më cilësore, duke qenë se është trefish më shumë e ardhura që do të marrin, më shumë mundësi për honorare ndja artistëve. Është një mbështetje për artistët që mund të angazhohen në kontrata të jashtme», tha ajo, duke shtuar se strukturat do të mund të shpërblejnë edhe cilësinë artistike të të punësuarve gjatë periudhave me aktivitete të ngjeshura.
Reforma përfshin disa nga institucionet kryesore të vendit, si Teatri Kombëtar, Teatri Kombëtar i Operës, Baletit dhe Ansamblit Popullor, Teatri Kombëtar Eksperimental, Galeria Kombëtare e Arteve, Qendra Kombëtare e Kulturës për Fëmijë dhe Teatri i Kukullave, Cirku Kombëtar, Biblioteka Kombëtare e Shqipërisë, Arkivi Qendror Shtetëror i Filmit dhe Qendra Kombëtare e Librit dhe Leximit.
Lexo edhe
Më shumë →Koleksione · të dhëna të verifikuara
Vazhdo me më të lexuarat sot
Përditësuar