Probleme globale me Microsoft, miliona përdorues pa akses në email

Miliona njerëz në mbarë botën kanë mbetur pa akses në postën elektronike për shkak të problemeve të shumta me shërbimet e Microsoft, ku përfshihet sistemi i njohur Outlook, ndërsa mijëra përdorues nga e gjithë bota kanë raportuar probleme që kanë nisur rreth orës 18:30.

Përdoruesit jo vetëm që nuk mund të dërgojnë apo të marrin email, por Microsoft Outlook nuk hapet fare, ndërsa kur përpiqen të hyjnë përmes shfletuesit të internetit, atyre u shfaqet mesazhi “Something went wrong” (Diçka shkoi keq). Sipas të dhënave të bëra publike, dyshohet se shkaku mund të jetë një defekt në serverët e Microsoft, ndërsa faqja që tregon nëse shërbimet e kompanisë po funksionojnë shfaq mesazhin e gabimit “502, Bad Gateway”, që tregon se shërbimi nuk po i përgjigjet sistemit Azure Front Door.

Kompania ka konfirmuar zyrtarisht situatën përmes profileve të saj në mediat sociale dhe njoftimeve drejtuar përdoruesve, duke sqaruar se po punon për të zbutur ndikimin. «Ndërsa punojmë për të zbutur ndikimin, mund të konfirmojmë se ky problem mund të ndikojë në lidhjen me shërbimet e Microsoft 365 për përdoruesit në çdo zonë gjeografike», tha kompania për Microsoft. Ajo shtoi se po heton raportet e përdoruesve që kanë probleme me aksesin në kutitë e tyre postare të Exchange Online duke përdorur metoda të ndryshme lidhjeje në Amerikë, si dhe se ka zbuluar se një pjesë e infrastrukturës po përjeton ngarkesë të lartë në disa rajone, gjë që mund të ndikojë në gabimet e lidhjes.

Përveç Outlook, problemet nuk janë kufizuar vetëm aty, pasi të gjitha programet e Microsoft 365 si Teams dhe Copilot po përjetojnë keqfunksionime dhe të gjitha mjetet profesionale nuk janë aktualisht të disponueshme në kompjuterët e mijëra punonjësve. Ndërkohë, kompania ka bërë të ditur se informacione të mëtejshme do të jenë të disponueshme në Qendrën e Administrimit të Microsoft 365, me referencën EX1550543.