PriFest prezanton katër filma për kujtesën, miqësinë dhe familjen

Edicioni i 18-të i PriFest, i cili mbahet nga 8 deri më 13 shtator, ka zbuluar programin e Kategorisë së Metrazhit të Mesëm. Ky seksion përfshin katër filma me origjinë nga Kosova, Gjermania, Shqipëria, Kroacia, Franca, Bullgaria dhe Zvicra, të bashkuar nën titullin “Një program mes kujtesës, miqësisë dhe familjes”.

Programi hapet me “The Sons of Ilir”, një dramë për kthimin dhe përballjen me të kaluarën, e regjizuar nga Robert Deçani. Në përzgjedhje bën pjesë edhe “Apollon Club” i Kruno Trninić, i cili trajton miqësinë dhe adoleshencën, dhe do të ketë premierën botërore në PriFest. Filmi “Les Nocturnes” i Siham Bel përqendrohet te sakrifica e një nëne, ndërsa “Blue Days” i Lina Pavlovës ndjek marrëdhëniet mes tri brezash grash brenda një dite të vetme.

Përmes këtyre katër produksioneve, festivali synon të sjellë në Prishtinë zëra të ndryshëm të kinemasë evropiane, me histori që prekin kufijtë kulturorë.