Portugalia nderon Cristiano Ronaldon në ndeshjen kundër Danimarkës

Kombëtarja e Portugalisë ka planifikuar një sërë nderimesh të veçanta për Cristiano Ronaldon, në shenjë mirënjohjeje për kontributin e tij të jashtëzakonshëm ndër vite. Sipas gazetës zvicerane „Blick“, në ndeshjen ndaj Danimarkës, futbollistët portugezë pritet të zbresin në fushë me fanella që mbajnë numrin 7, simbolin e identitetit të tij për më shumë se dy dekada.

Homazhet për legjendën e futbollit do të vazhdojnë në minutën e shtatë të takimit, ku tifozët në stadiumin e Bragës pritet t'i kushtojnë një moment të veçantë yllit portugez. Gjithashtu, Federata Portugeze e Futbollit ka ndërmarrë një tjetër veprim simbolik duke e lënë bosh dhe të paprekur dhomën që Ronaldo përdorte zakonisht gjatë grumbullimeve në qendrën stërvitore të kombëtares.

Ronaldo e mbylli karrierën me përfaqësuesen portugeze më 5 nëntor, pas një rrugëtimi prej 234 paraqitjesh dhe 146 golash, që nisi që nga debutimi i tij në gusht të vitit 2003. Ndeshja mes Portugalisë dhe Danimarkës luhet të shtunën nga ora 20:45, në kuadër të xhiros së pestë të Grupit A4 të Ligës së Kombeve.