Si pritet ta zgjidhë pompa e re krizën e ujit në Strimnicë?
NPK – Zhelinë e instaloi pompën e re pas 24 orësh punë, pasi pompa e vjetër s'kishte kapacitet për gjithë fshatin në verë.
STRIMNICË — Ndërmarrja Publike Komunale e Zhelinës (NPK – Zhelinë) thotë se pompa e re, e instaluar pas 24 orësh pune pa ndërprerje, do t'u sigurojë ujë të pijshëm të gjitha shtëpive në Strimnicë. Drejtori i NPK-së, Suad Alili, deklaroi se "secila shtëpi në Strimnicë do të ketë ujë" pasi të përfundojnë punimet në terren.
Banorët e fshatit janë të revoltuar, pasi kjo krizë përsëritet çdo verë dhe akuzojnë autoritetet lokale për neglizhencë të kahershme. "Që prej një jave, unë jetoj në lagjen e lartë dhe s'kemi pikë uji. Pagesat na i kërkojnë rregullisht, ndërsa ujin e lëshojnë kur të duan ata," thotë një banor.
Një banor tjetër fajëson menaxhimin komunal: "Ky problem nuk është i sotëm, ka qenë gjithmonë. Por, që kur e mori menaxhimin komuna para dhjetë vitesh, situata u rëndua fare. Kur e menaxhonim privatisht, funksiononte shumë më mirë," thotë ai.
Një banor i tretë shton se problemi kërkon angazhimin e të gjithëve: "Vera i ka sfidat e veta, vijnë edhe mërgimtarët dhe harxhimi rritet. Por ata vijnë me ditë të numëruara dhe duhet t'u sigurohen kushtet minimale." Për shkak të dështimeve të njëpasnjëshme të rrjetit publik, shumica e banorëve kanë hapur puse në oborret e tyre.
Nga NPK – Zhelinë arsyetohen se fajin për ndërprerjen e kishte kapaciteti i pamjaftueshëm i pompës së vjetër, e cila nuk mund ta përballonte furnizimin e të gjithë fshatit. Alili shpjegoi se projekti ishte gati, por procedurat e vonuan zbatimin: "Dje kemi punuar 24 orë pa ndërprerje për funksionalizimin e saj dhe pastrimin e pusit," tha ai.
Ditët në vijim do të tregojnë nëse pompa e re do t'i japë fund vërtet krizave sezonale të ujit që kanë munduar Strimnicën për një dekadë.
Burim: TV21
— Redaksia ZHURMA