Policia dhe shkolla forcojnë bashkëpunimin për sigurinë e nxënësve

Siguria e nxënësve, parandalimi i rreziqeve dhe gatishmëria institucionale për situata emergjente kanë qenë në fokus të një takimi pune ndërmjet përfaqësuesve të një institucioni shkollor dhe Policisë së Komunitetit. Gjatë këtij takimi, sekretarja e shkollës Vlora Govori dhe koordinatori për sigurimin e cilësisë Rexhep Arifi kanë pritur zyrtarët e policisë Sami Robelli dhe Adile Shabani për të diskutuar rreth avancimit të mekanizmave të bashkëpunimit dhe forcimit të masave parandaluese në ambientet shkollore.

Temë kryesore e diskutimeve ka qenë edhe përditësimi i Planit Emergjent të shkollës, si dokument i rëndësishëm për të përmirësuar procedurat e veprimit dhe për të rritur gatishmërinë në raste emergjente. Në përfundim të takimit, palët janë dakorduar që bashkëpunimi ndërmjet institucionit arsimor dhe Policisë së Kosovës të vazhdojë rregullisht, duke vlerësuar se siguria në shkolla mbetet një detyrim i përbashkët që kërkon angazhim të vazhdueshëm institucional.