Phillips: Kosovës i mungon pjekuria për partneritet strategjik me SHBA-në

PRISHTINË — Politologu amerikan David L. Phillips ka deklaruar se Kosovës i mungon pjekuria politike për të qenë partnere strategjike e SHBA-së, duke fajësuar shoqërinë për ngërçin institucional dhe mungesën e llogaridhënies. Profesori i Universitetit Georgetown vlerësoi se bllokada aktuale po dëmton rëndë raportet me Uashingtonin zyrtar.

Sipas ekspertit amerikan, i cili ka shërbyer si këshilltar në Departamentin e Shtetit, Prishtina duhet të kërkojë urgjentisht emërimin e një të dërguari të posaçëm të SHBA-së. Ky emërim duhet të bëhet me qëllim që zyrtari amerikan të punojë paralelisht me homologun e tij nga Bashkimi Evropian në procesin e dialogut.

Kritikat e politologut vijnë në një kohë kur Serbia ka nisur raundin e parë të dialogut strategjik me SHBA-në më 17 korrik. Ndërsa Beogradi forcon pozitat e tij me Uashingtonin, Prishtina zyrtare mbetet prapa për shkak të pezullimit të planifikimit të këtij dialogu nga pala amerikane.

Ambasada e SHBA-së ka konfirmuar se pezullimi i planifikimit ndodhi në shtator të vitit 2025 për shkak të veprimeve të qeverisë në detyrë. Uashingtoni kërkon hapa konkretë për përmbushjen e zotimeve në lidhje me serbët e Kosovës dhe funksionalizim të plotë të institucioneve përpara se të rinisë ndonjë proces.

Ndonëse kryeministri në detyrë Albin Kurti pati deklaruar më 19 shtator 2025 se marrëdhëniet me Amerikën nuk janë prishur, por ekzistojnë vetëm disa dallime, ngërçi vazhdon. Mungesa e institucioneve të konstituuara plotësisht po mban pezull çdo mundësi për bashkëpunim të thelluar në mbrojtje apo energji.

Një pikë tjetër kritike është projekti i gazit amerikan. Phillips paralajmëroi se Kosova rrezikon ta humbasë këtë mundësi, veçanërisht nën administratën e presidentit Donald Trump, i cili ndjek një politikë shumë transaksionale. Sipas tij, Prishtina duhet ta paraqesë veten si një aset ekonomik për të siguruar përkrahjen.

Ndërkaq, ministrja në detyrë e Ekonomisë, Artane Rizvanolli, ka mohuar pretendimet se qeveria është kundër gazit të lëngshëm natyror, duke theksuar se kanë memorandume bashkëpunimi me Shqipërinë. Ajo shtoi se Kosova thjesht ka prioritizuar prodhimin vendor përmes thëngjillit dhe burimeve të ripërtëritshme si era dhe dielli.

Burim: Kallxo
— Redaksia ZHURMA