Pesë ish-policë serbë arrestohen për masakrën e Reçakut

PRISHTINË — Policia e Kosovës ka arrestuar pesë serbë të dyshuar për përfshirje në masakrën e Reçakut. Bashkim Spahiu, drejtor i hetimeve, konfirmoi se të arrestuarit kanë qenë ish-pjesëtarë të MUP-it serb para dhe gjatë luftës.

Të dyshuarit e arrestuar janë N.P. (lindur më 5 shtator 1968 në Shtërpcë), S.J. (lindur më 2 gusht 1967 në Shtërpcë), B.P. (lindur më 6 dhjetor 1969 në Shtërpcë), S.M. (lindur më 17 prill 1978 në Shtërpcë) dhe S.S. (lindur më 28 janar 1966 në Gjilan). Sipas policisë, i dyshuari B.P. u arrestua sot në pikën kufitare në Merdarë.

Gjatë bastisjeve, policia gjeti dhe sekuestroi një armë artizanale, një uniformë ushtarake, një distinktiv të uniformës së policisë serbe, një palë pranga, një shufër policore dhe një set sinjalizues për trafik. U konfiskuan edhe 43 fishekë, një maskë, një çantë ushtarake, katër telefona mobil, dy video-kaseta, tri targa veturash, një aparat fotografik dhe dokumente të MUP-it.

Përveç pajisjeve, policia sekuestroi edhe shuma parash të gatshme në valuta të ndryshme. Zyrtarisht u konfirmua se në këtë aksion janë gjetur 30 mijë e 585 euro, 438 mijë e 190 dinarë serbë, si dhe 5 dollarë amerikanë, të cilët janë sekuestruar në cilësinë e provave materiale për procedurat e mëtejshme gjyqësore.

Prokurori special Ilir Morina deklaroi se ky aksion vjen pas gjashtë muajve hetime që pas ngritjes së aktakuzës. Ai sqaroi se gjatë këtyre hetimeve u arrit të identifikoheshin disa persona të njësive të posaçme të Policisë së Serbisë, të cilët morën pjesë në aksionin e 15 janarit të vitit 1999.

Në dhjetor të vitit 2025, Prokuroria Speciale kishte ngritur aktakuzë ndaj 21 personave për krime lufte kundër popullsisë civile. Sipas aktakuzës, të pandehurit akuzohen se si pjesëtarë të Ushtrisë së ish-Jugosllavisë, konkretisht të Brigadës 243 të Mekanizuar të Korpusit të Prishtinës, dhe MUP-it serb vranë 42 civilë në fshatin Reçak.

Këto arrestime shënojnë përparim në zbardhjen e masakrës së Reçakut. Përveç vrasjeve, të pandehurit akuzohen në bashkëkryerje për trajtim çnjerëzor, shkatërrim të pasurisë, dëbim masiv dhe spastrim etnik të popullsisë civile shqiptare, siç specifikohet zyrtarisht në aktakuzën e ngritur.

Burim: Kallxo
— Redaksia ZHURMA