Përurohet biblioteka e re në Stubëll

Biblioteka “Dom Mikel Tarabulluzi” është përuruar në Qendrën Pastorale-Kulturore të Famullisë së Stubllës, në një aktivitet ku mori pjesë kryetari i Komunës së Vitisë, Sokol Haliti, së bashku me përfaqësues të komunitetit dhe të pranishëm të tjerë. Ky projekt synon të krijojë hapësira të reja për lexim, edukim dhe zhvillim intelektual, duke shërbyer si një qendër e rëndësishme për jetën arsimore dhe kulturore të banorëve të këtij lokaliteti, të komunës dhe mbarë vendit.

Vendi ku u ngrit ky objekt ka shënuar një ngjarje me rëndësi të veçantë për jetën komunitare dhe kulturore, ndërsa nisma synon ruajtjen e traditës arsimore dhe ofrimin e mundësive të reja për gjeneratat e reja që duhet t'i kushtojnë vëmendje librit. Gjatë ceremonisë, kryetari Haliti përgëzoi famullitarin Don Fatmir Koliqi për angazhimin dhe përkushtimin në realizimin e bibliotekës dhe ngritjen e qendrës rinore, duke e cilësuar këtë si një kontribut të çmuar për komunitetin.

Sipas kryetarit Haliti, angazhimi i përbashkët dëshmon se solidariteti komunitar është faktor kyç në ndërtimin e hapësirave që i shërbejnë interesit të përgjithshëm. Ai gjithashtu shprehu mirënjohje për këshillin e fshatit dhe për të gjithë banorët e Stubllës për kontributin e dhënë në realizimin e projektit, duke falënderuar gjithashtu Oliver Pera për kontributin e çmuar financiar në funksionalizimin e bibliotekës.

Një vëmendje e veçantë iu kushtua figurës historike të Dom Mikel Tarabulluzit, ku kryetari Haliti vlerësoi lart kontributin e tij në historinë e arsimit shqip. Ai theksoi se emërtimi i bibliotekës me emrin e mësuesit të shkollës së parë shqipe në Kosovë përbën një akt domethënës nderimi dhe ruajtjeje të kujtesës historike, duke lidhur traditën arsimore me nevojat e së ardhmes.