Përfundon rikonstruimi i rrugës Lamë–Kllokoq në Artanë
Ministria e Infrastrukturës njofton përfundimin e projektit rrugor me vlerë 688 mijë euro.
Redaksia ZHURMA · · 1 min lexim
Ka përfunduar projekti i rikonstruimit të rrugës Lamë–Kllokoq në komunën e Artanës, e cila tashmë është bërë plotësisht funksionale për qarkullim. Sipas njoftimit të Ministrisë së Infrastrukturës dhe Transportit, ky investim kap vlerën e 688 mijë eurove dhe shtrihet në një gjatësi prej 3.4 kilometrash.
Punimet e kryera përfshijnë rikonstruimin e plotë të aksit, asfaltimin me dy shtresa, rregullimin e sistemit të kullimit të ujërave, vendosjen e pahive mbrojtëse si dhe vendosjen e sinjalizimit rrugor. Përfundimi i këtij projekti synon të ofrojë kushte më të mira për banorët e zonës dhe të gjithë shfrytëzuesit, duke rritur njëkohësisht sigurinë në qarkullim.
Nga ana e saj, Ministria ka theksuar se mbetet e përkushtuar në zhvillimin dhe modernizimin e infrastrukturës rrugore në të gjitha pjesët e vendit, duke paralajmëruar vazhdimin e investimeve të ngjashme.
