PDK kërkon formimin e një komisioni hetimor pas vrasjes së Arlinda Zekajt

Partia Demokratike e Kosovës ka paralajmëruar ngritjen e një komisioni hetimor parlamentar për të zbardhur përgjegjësitë institucionale pas vrasjes së Arlinda Zekajt. Ky paralajmërim vjen pasi deputetja e kësaj partie, Besa Kabashi-Ramaj, kërkoi publikisht dorëheqjen ose shkarkimin nga kryeministri Albin Kurti të ministrit të Punëve të Brendshme, Xhelal Sveçla, dhe ministres së Drejtësisë, Donika Gërvalla-Schwarz, për shkak të dështimeve në mbrojtjen e viktimës.

Kabashi-Ramaj theksoi gjatë një konferencë për media se opozita do të angazhohet që rastet e dështimeve të mos mbeten thjesht raporte në arkivat zyrtare. Ajo sqaroi se mbrojtja e jetës së qytetarëve është e garantuar me Kushtetutë dhe ligje, ndaj institucionet duhet të japin llogari se kush kishte detyrimin të vepronte në rastin e Arlinda Zekajt.

Deputetja e PDK-së vërejti se ministrja Donika Gërvalla-Schwarz, e cila shërben edhe si Koordinatore Kombëtare për mbrojtjen nga dhuna në familje dhe dhuna ndaj grave, i ka pranuar dështimet por po i shmanget përgjegjësisë politike. Po ashtu, ajo shtoi se dorëheqja e Drejtorit të Përgjithshëm të Policisë, Gazmend Hoxha, nuk e amniston ministrin Xhelal Sveçla. Si dëshmi shtesë të keqmenaxhimit në Ministrinë e Punëve të Brendshme, ajo përmendi anulimin e ceremonisë së diplomimit të 300 policëve të rinj për mungesë uniformash.

Opozita pret që kryeministri Kurti të veprojë për shkarkimin e dy anëtarëve të kabinetit qeveritar nëse ata refuzojnë të largohen vetë, ndërsa hapi i ardhshëm parlamentar mbetet procedimi i komisionit hetimor.

Kabashi-Ramaj u shpreh gjatë fjalës së saj se drejtori i Policisë nuk mund të bëhet kurban i frikës së ministrit për t'u përballur me përgjegjësinë politike. «Arlindën nuk mund ta kthejmë. Por kemi një detyrim ndaj saj, ndaj familjes së saj dhe ndaj çdo gruaje e vajze në Republikën e Kosovës. Që vdekja e saj të mos përfundojë si një tjetër raport në arkivat e institucioneve», deklaroi deputetja. Ajo nënvizoi gjithashtu se «ministri nuk është penalisht përgjegjës për çdo veprim të një zyrtari policor. Por është politikisht përgjegjës për politikat, kushtet dhe drejtimin institucional në fushën që e udhëheqë».