Paytas: Shpenzova më shumë se 12 milionë dollarë për krijimin e videove

Trisha Paytas ka dhënë detaje të reja rreth karrierës së saj në platformat digjitale, duke zbuluar shpenzimet e konsiderueshme që ka bërë ndër vite për krijimin e përmbajtjeve. Influencuesja amerikane kishte tërhequr vëmendje më parë pasi bëri publike se kishte siguruar rreth 100 mijë dollarë, ose afërsisht 86 mijë euro, brenda vetëm një jave në YouTube, shifër që e tregoi gjatë një paraqitjeje në emisionin «Watch What Happens Live with Andy Cohen».

Gjatë rrëfimeve të saj për media ndërkombëtare, ajo ka treguar se prodhimi i videove ka kërkuar investime të mëdha financiare. Paytas deklaroi se gjatë një periudhe dhjetëvjeçare kishte shpenzuar më shumë se 12 milionë dollarë për realizimin e materialeve të saj. Ajo publikon përmbajtje në YouTube qysh prej vitit 2007, ndërsa krahas kësaj platforme ka krijuar materiale për OnlyFans, ka realizuar video ASMR dhe ka qenë aktive në TikTok e Twitter, kurse aktualisht drejton podcastin «Just Trish».