Uji i Gostivarit me 48 herë më shumë baktere — tre në paraburgim

GOSTIVAR — Partitë politike në Maqedoninë e Veriut kërkuan përgjegjësi për krizën e ujit të pijshëm në Gostivar, pasi prokuroria konstatoi se uji i konsumuar kishte 48 herë më shumë baktere se vlerat e lejuara për shëndetin publik. Zbulimi shkaktoi reagime të forta dhe u shpall epidemi e problemeve gastrointestinale.

Kryetari i Komunës së Gostivarit, Valbon Limani, përballet drejtpërdrejt me kërkesat për përgjegjësi. VMRO-DPMNE, parti në pushtet, i fajësoi LSDM-në, BDI-në dhe Taravarin për mosreagim në kohë ndaj problemit, ndërsa LSDM-ja opozitare alarmoi se informatat, përfshirë analizat e ujit, po fshihen nga publiku, teksa Prokuroria i referohet fshehtësisë së hetimit.

Inspektorët e Agjencisë për Ushqim dhe Veterinari, së bashku me policinë dhe përfaqësues të Ministrisë së Mjedisit, konstatuan se në tubacionin kryesor ishte vendosur në mënyrë të paligjshme një pompë që fuste drejtpërdrejt ujë nga lumi Vardar. Kontrolli u krye pas njoftimit të prokurorit publik, në bazë të dyshimeve se uji ishte ndotur dhe të ankesave të qytetarëve.

Qendra për Shëndet Publik (QSHP) Tetovë lëshoi raportime kontradiktore, më 29 qershor dhe 13 korrik, sipas të cilave uji ishte i sigurt për konsum. Prokuroria kishte konstatuar tjetër: që nga 25 qershori, një pompë e vendosur në dhomën e tejmbushjes në fshatin Vërtok kishte çuar ujëra të zeza në shtëpitë e banorëve të Gostivarit.

Epidemia e problemeve gastrointestinale përfshiu numër të lartë qytetarësh me simptoma si diarre, të vjella dhe dehidratim. Gostivarasit marrin çdo ditë mbi 60 tonë ujë për pije dhe nevoja teknike. Pas konstatimit të kontaminimit, uji u ndalua për pirje.

Me propozim të Prokurorisë, Gjykata Penale në Gostivar shqiptoi 30 ditë paraburgim për tre të dyshuarit për ndotjen e sistemit të ujësjellësit. Gjykatësja Dragoslada Veselinova tha se krimi që u ngarkohet të dyshuarve sanksionohet me të paktën 4 vjet burg, ndërsa nëse mbrohen në liri, ekziston rreziku i arratisjes ose i ndikimit te dëshmitarët.

Më 20 korrik, Prokuroria Publike shpalli rezultatet e analizave të ujit të Gostivarit, të cilat konfirmuan tejkalimin e vlerave të lejuara me baktere. Hetimi për rastin e ujit në Gostivar vazhdon.

Burim: Portalb
— Redaksia ZHURMA