Kuvendi mblidhet më 6 gusht — partitë pa marrëveshje për presidentin

PRISHTINË — Përfaqësuesit e partive politike në Kosovë kanë arritur konsensus për rendin e ditës të seancës konstituive të Kuvendit, por kanë mbetur pa marrëveshje për zgjedhjen e presidentit të ri. Ky vendim erdhi pas një takimi të thirrur nga ushtruesja e detyrës së presidentes, Albulena Haxhiu, e cila bëri thirrje për seriozitet maksimal për të shmangur zgjedhjet e reja.

Gjatë takimit u konfirmua se seanca konstituive do të mbahet më 6 gusht, datë kjo që shënon edhe fillimin e afateve kushtetuese për formimin e qeverisë. Ky vendim vjen pasi Haxhiu thërriti zyrtarisht seancën konstituive për të nisur formimin e institucioneve të reja që do të zgjedhin kryetarin dhe nënkryetarët e Kuvendit.

Në këtë kuadër, Haxhiu kërkoi konsensus mes LVV-së dhe LDK-së për postin e presidentit, duke theksuar se takimet mes tyre duhet të vazhdojnë sa më parë. Deputetja e zgjedhur e Vetëvendosjes, Arbërie Nagavci, pranoi se ka pasur vetëm një takim fillestar konstruktiv mes Albin Kurtit dhe Lumir Abdixhikut, por ende nuk ka ndonjë dakordim për pozitat.

Lidhja Demokratike e Kosovës, përmes Jehona Lushakut, potencoi se marrëveshja ndërtohet mbi parimet dhe programin qeverisës. Lushaku sqaroi se orientimi i Kosovës për vitet e ardhshme duhet të jetë pika e parë e pajtimit para ndarjes së posteve.

Ndërkohë, PDK dhe AAK rikonfirmuan se do të mbeten në opozitë. Vlora Çitaku deklaroi se PDK përjashton bashkëqeverisjen, ndonëse do të mbështesë konstituimin e institucioneve, ndërsa Besnik Tahiri nga Aleanca paralajmëroi rrezikun e cikleve të reja zgjedhore.

Përmbyllja e kësaj faze është jetike, pasi afati kushtetues prej 30 ditësh për konstituimin e Kuvendit konsumohet më së largu deri më 7 gusht. Nëse partitë nuk arrijnë të gjejnë një gjuhë të përbashkët për presidentin pas konstituimit, Kosova rrezikon të shkojë sërish në zgjedhje të jashtëzakonshme.

Burim: Gazeta Dukagjini
— Redaksia ZHURMA