Mbi 40 artizanë mbushin Tetovën për panairin e traditës
Shitësit: Puna e dorës vlerësohet shumë pak në vendin tonë
TETOVË — Për të tretin vit me radhë, rruga e artizanëve në Tetovë u mbush me ngjyra, punime dore dhe elemente tradicionale. Rreth 40 shitës e prodhues nga vendi dhe rajoni i pranishëm i zbuluan produktet e tyre për qytetarët, me synim që të ruajnë traditën shumëvjeçare.
Pjesëmarrësit në panair shprehen të kënaqur me interesimin e qytetarëve. Disa prej tyre prej dekadash merren me përpunimin e ushqimeve tradicionale, duke depërtuar edhe në tregjet e huaja.
“Kemi traditë 22 vjeçare. Kemi turshi, ajvar me gjithë sasitë e tyre sipas Europës. Bëjmë shpërndarjen jashtë shtetit 70% të mallit, prodhim vendor. Gjithashtu kemi edhe keçapin. Keçapin e kemi… dhe kastravecët i prodhojmë vetë. Si në fushë, deri në prodhim final.”
Përveç ushqimit, panairi shërbeu edhe si hapësirë për promovimin e punës sociale dhe integrimit. Një pjesë e punimeve të ekspozuara u realizuan nga të rinjtë përmes terapisë së punës, me fokus te riciklimi.
Kreu i Tetovës, Bilall Kasami, theksoi se qëllimi i këtij organizimi është rikthimi i identitetit të kësaj zone dhe ndihma ndaj artizanëve që pasionin ta kthejnë në ekonomi familjare. “Në këtë panair këtë vit marrin pjesë mbi 40 ekspozues, njerëz të cilët merren me këtë profesion më shumë nga dëshira dhe dashuria që kanë për këtë profesion se sa nga aspekti komercial.”
Burim: TV21
— Redaksia ZHURMA