OVL-UÇK: Dhomat e Specializuara nuk kanë pushtet mbi Kuvendin e Kosovës

Organizata e Veteranëve të Luftës së Ushtrisë Çlirimtare të Kosovës i ka reaguar kryetares së Dhomave të Specializuara, Ekaterina Trendafilova, duke theksuar se Dhomat e Specializuara nuk kanë pushtet mbi Kuvendin e Kosovës që i ka themeluar dhe se ligjet në vend i miraton vetëm ky institucion legjislativ.

Përplasja verbale erdhi pasi kryetarja e Dhomave të Specializuara të Kosovës në Hagë, Ekaterina Trendafilova, publikoi një videomesazh dhe komunikatë ku mbrojti pavarësinë e gjykatës dhe të gjyqtarëve. Ajo nënvizoi përkushtimin e institucionit ndaj sundimit të ligjit, zhvillimit të gjykimit të drejtë si dhe mbrojtjes së dëshmitarëve e viktimave. Po ashtu, Trendafilova përmendi rastet e frikësimit të dëshmitarëve, duke deklaruar se përpjekjet për të penguar drejtësinë kanë çuar tashmë në dënime dhe pranime të fajësisë, ndërsa shtoi se kritikat ndaj vendimeve gjyqësore janë legjitime në shoqëri demokratike por askush nuk mund t’u diktojë gjyqtarëve mënyrën se si duhet ta interpretojnë dhe zbatojnë ligjin.

Në përgjigjen e saj publike për media, OVL-UÇK e ka cilësuar si të çuditshme dhe qesharake pretendimin se një gjykatë mund të zgjedhë ligjin që rregullon veprimtarinë e vet, njoftuan përfaqësuesit e veteranëve. Organizata rikujtoi se Dhomat e Specializuara ekzistojnë vetëm sepse u krijuan përmes vendimeve të Kuvendit të Kosovës, ndaj nuk mund tëushtrojnë pushtet mbi organin që i dha jetë juridike. Më tej, organizata e konsideroi arrogancë faktin që i mbahen leksione Kuvendit për sundimin e ligjit ndërsa interpretimi personal trajtohet si i padiskutueshëm, sipas reagimit zyrtar.

Organizata e Veteranëve bëri me dije se nuk do të heqë dorë nga e drejta legjitime për të kritikuar vendimet gjyqësore, duke potencuar se asnjë proces apo vendim në Hagë nuk mund ta fshijë të vërtetën se Lufta Çlirimtare ishte e drejtë. Sipas OVL-UÇK-së, liria dhe shtetësia e Kosovës mbështeten mbi sakrificën e atyre që u ngritën kundër gjenocidit. Për rrjedhojë, organizata kërkoi që gjykatat të mos shndërrohen në institute historie, por ta ushtrojnë mandatin e tyre me dinjitet e profesionalizëm, cilësi të cilat, sipas veteranëve, kanë munguar në funksionimin e Dhomave të Specializuara.