OVL-ja dënon keqpërdorimin e flamurit të UÇK-së në protestat në Tiranë
Organizata e Veteranëve të Luftës së UÇK-së reagon pas përdorimit të flamurit gjatë protestave në Tiranë.
Redaksia ZHURMA · · 1 min lexim
TIRANË — Organizata e Veteranëve të Luftës së UÇK-së ka reaguar ndaj keqpërdorimit të flamurit me simbolin e Ushtrisë Çlirimtare të Kosovës në protestat e Tiranës.
Organizata ka dënuar çdo keqpërdorim të këtij flamuri, duke i cilësuar veprimet si akte vandalizmi. Sipas reagimit të saj, flamuri i UÇK-së përfaqëson Luftën Çlirimtare të Kosovës, dëshmorët e kombit dhe lirinë e fituar nga sakrifica e tyre, ndaj nuk mund të përdoret kurrë për të justifikuar, identifikuar apo fshehur veprime që dëmtojnë pronën publike apo private.
Ndonëse çdo qytetar ka të drejtën e protestës, organizata ka theksuar se asnjë pakënaqësi nuk i jep të drejtë askujt ta lidhë flamurin e UÇK-së me dhunën, shkatërrimin dhe plaçkitjet, duke u bërë thirrje organizatorëve dhe pjesëmarrësve të ruajnë dinjitetin dhe shenjtërinë e këtij simboli.
