Osmani: Përgjegjësia për vrasjen e Arlinda Zekajt nuk varroset me viktimën

Ish-presidentja Vjosa Osmani ka reaguar pas vrasjes së 49-vjeçares Arlinda Sylaj Zekaj më 25 tetor në Vitomiricë të Pejës, duke deklaruar se përgjegjësia për këtë ngjarje nuk mund të varroset bashkë me viktimën. Osmani ka kërkuar llogaridhënie nga sistemi i drejtësisë, i cili sipas saj dështoi t'i garantonte mbrojtje viktimës pasi ajo kishte kërkuar ndihmë nga Policia.

Arlinda Sylaj Zekaj kishte kërkuar ndihmë nga institucionet për dhunë në familje dhe ishte kthyer në shtëpi e shoqëruar nga një patrullë policore, pak minuta para se të gjendej pa shenja jete. Për kryerjen e krimit me sëpatë dyshohet kunati i saj, Albert Sylaj, i cili ndodhet në kërkim nga Policia e Kosovës.

Përmes një postimi në rrjetin social Facebook, Osmani ka kritikuar funksionimin e institucioneve mbrojtëse, duke theksuar se vrasja e grave nga dhuna po shndërrohet në një plagë të përsëritur në Kosovë. Ajo ka thënë se kur një grua kërkon shpëtim nga sistemi i drejtësisë dhe përfundon e vrarë, ky dështim nuk është thjesht burokratik, por është fatal. Sipas Osmanit, drejtësia e la viktimën në duart e vrasësit, prandaj edhe vetë sistemi që duhej ta mbronte duhet të japë llogari.

Policia e Kosovës vazhdon kërkimet për kapjen e të dyshuarit Albert Sylaj, ndërsa institucionet e drejtësisë përballen me kritika për mënyrën e trajtimit të rastit të dhunës në familje.

«Ajo kërkoi mbrojtje. Drejtësia e la në duart e vrasësit. Fatkeqësisht, femicidi po shndërrohet në plagë të përsëritur të Kosovës. Gratë nuk po vriten vetëm nga duart e dhunuesve. Ato po vriten edhe nga dështimi i një sistemi që ua premton mbrojtjen, por nuk ua garanton jetën. Kunati i saj e vrau Arlindën me sëpatë, por edhe sistemi që duhej ta mbronte duhet të japë llogari. Dhe kjo përgjegjësia nuk mund të varroset bashkë me viktimën», ka shkruar Osmani në reagimin e saj.