Pse opozitarët quajnë mashtrim arsyetimin e Rizvanollit për gazin?

PRISHTINË — Deputetë të zgjedhur të partive deri tash në opozitë, e kanë cilësuar mashtrim arsyetimin e ministres në detyrë të Ekonomisë, Artane Rizvanolli, në lidhje me insistimin e Qeverisë për gazifikim të thëngjillit dhe jo për lidhje në rrjetin rajonal të gazit amerikan.

Gjatë ditës, Rizvanolli në një video në Facebook tha se Kosova nuk është kundër gazit amerikan. Ajo tha se Kosova as nuk ka lidhje me gazin rus.

Ajo ka theksuar se në vend të ndërtimit të gazsjellësit e infrastrukturës përcjellëse, zgjidhje më të duhur Qeveria e ka parë importimin e gazit të lëngëzuar përmes Vlorës, prodhimin e energjisë atje dhe transmetimin pa pasur nevojë për investime shtesë.

Deputeti i zgjedhur i Lidhjes Demokratike të Kosovës, Avdullah Hoti, e ka cilësuar mashtrim deklaratën e Rizvanollit. “Ja pse deklarata e Rizvanollit është mashtruese: Kosova nuk e përdor drejtpërdrejt gazin rus për energji. Por, Kosova importon energji nga vende që prodhojnë energji duke përdorur gazin rus”, ka shkruar ai në Facebook.

Enver Hoxhaj i Partisë Demokratike të Kosovës ka thënë se Kosovës nuk i duhen arsyetime pse nuk lidhet me gazin amerikan, por vizion dhe vendimmarrje strategjike për t’u bërë pjesë e tij.

Shtetet e Bashkuara kanë shprehur synimin ta ndryshojnë mënyrën se si furnizohet me energji Ballkani Perëndimor, duke bërë një rrjet marrëveshjesh për importin e gazit të lëngshëm.

Kosova nuk ka infrastrukturë të gazit dhe mbështetet plotësisht në termocentralet me qymyr. Projekti për një interkonektor gazi me Maqedoninë e Veriut është përfshirë më herët në planin investues të BE-së për Ballkanin Perëndimor, por është ndalur për shkak të, siç kanë thënë nga Qeveria, kostove të larta dhe fokusit strategjik në burimet e ripërtëritshme të energjisë.

Burim: Koha.net, https://www.koha.net/arberi/opozitaret-e-quajne-mashtrim-arsyetimin-e-rizvanollit-per-gazin
— Redaksia ZHURMA