Olivia Rodrigo i dhuroi 5 mijë dollarë një studenteje
Këngëtarja amerikane ka ndihmuar financiarisht një studente të Universitetit të Alabamës për t'i paguar semestrin e fundit.
Këngëtarja amerikane Olivia Rodrigo ka ndihmuar financiarisht një studente të Universitetit të Alabamës, duke i dhuruar 5 mijë dollarë për të përfunduar semestrin e fundit të studimeve. Jamie Causey, e cila u diplomua në Universitetin e Alabamës në gusht të vitit 2025, tregoi në TikTok se Rodrigo e kontaktoi privatisht pasi kishte parë videot e saj, në të cilat studentja fliste për vështirësitë për të përballuar shpenzimet e universitetit.
https://www.tiktok.com/@jamiemcausey/video/7675409735926975774
Causey, e cila është studente e gjeneratës së parë në familjen e saj dhe tashmë punon si këshilluese akademike në Universitetin e Alabamës, tha se fillimisht mendoi se bëhej fjalë për një llogari mashtruese, derisa pa shenjën e verifikimit. Ajo tregoi se kishte vendosur ta mbante private për ta respektuar dhe vlerësuar gjestin, por vendosi ta tregonte historinë pasi po planifikon të largohet nga TikTok-u.