Ish-oficeri Igli Haxhiaj dënohet me 2 vjet e 8 muaj burg për dekonspirim
Haxhiaj i zbuloi njërit prej të dyshuarve se ishin nën hetim e përgjim; sipas akuzës, në këmbim përfitoi 15 mijë euro.
TIRANË — Gjykata e Posaçme e Shkallës së Parë deklaroi të enjten, më 30 korrik, fajtor ish-oficerin e Policisë së Shtetit Igli Haxhiaj, i akuzuar nga SPAK se u zbuloi informacione sekrete hetimi anëtarëve të një grupi kriminal që kishte për detyrë t'i mbante nën vëzhgim.
Trupi gjykues e dënoi fillimisht me 4 vjet burgim; në zbatim të gjykimit të shkurtuar, dënimi u reduktua në 2 vjet e 8 muaj heqje lirie. Gjykata i caktoi Haxhiajt edhe dënimin plotësues: ndalim prej 5 vitesh nga ushtrimi i funksioneve publike.
Trupi gjykues — gjyqtarët Atalanta Zeqiraj, Marinela Osmani dhe Besmir Stroka — e deklaroi Haxhiajn fajtor për veprat penale “Zbulimi i akteve ose të dhënave sekrete”, “Korrupsioni pasiv” dhe “Shpërdorim i detyrës”.
Haxhiaj ka qenë oficer i policisë gjyqësore në Drejtorinë e Forcës së Posaçme Operacionale, në Drejtorinë e Përgjithshme të Policisë së Shtetit. Që nga viti 2019, kur filloi hetimi, ai ishte pjesë e ekipit që kryente përgjimin dhe vëzhgimin e fshehtë të të dyshuarve për trafik lëndësh narkotike.
Ndërsa vëzhgonte të dyshuarit, Haxhiaj i bëri me dije njërit prej tyre se ishin objekt hetimesh dhe që po përgjoheshin. Në këmbim të informacionit të dhënë, sipas akuzës, ai përfitoi shumën prej 15 mijë eurosh.
Hetimet e përbashkëta me drejtësinë italiane dhe zviceriane kanë zbuluar një grup kriminal, kryesisht me shtetas shqiptarë, që importonte lëndë narkotike nga Amerika e Jugut drejt porteve të Europës Veriore. Ish-kreu i SPAK, Altin Dumani, e ka ngritur më parë publikisht alarmin për korruptimin e zyrtarëve të policisë nga eksponentë të krimit të organizuar.
Burim: Reporter.al
— Redaksia ZHURMA