Pse e quan ministri Nufi stërvitjen NATO-Serbi 'nxitje flake mediatike'?
Ministri i Mbrojtjes Ermal Nufi minimizon shqetësimet për stërvitjen NATO-Serbi, ndërsa njofton tre ushtrime të përbashkëta me Kosovën dhe Kroacinë.
TIRANË — Ministri i Mbrojtjes Ermal Nufi ka folur për bashkëpunimin trepalësh ushtarak me Kosovën dhe Kroacinë, duke zbuluar se janë në planifikim tri stërvitje të përbashkëta.
Nufi u shpreh se stërvitja e përbashkët mes NATO-s dhe ushtrisë serbe, që po zhvillohet aktualisht, "është më shumë nxitje flake mediatike". Sipas tij, fakti që Shqipëria dhe Kroacia janë anëtare të NATO-s, ndërsa në Kosovë vepron misioni KFOR, tregon se kjo stërvitje nuk e shqetëson Tiranën zyrtare.
"Kemi një bashkëpunim me Kroacinë dhe Kosovën. Shtetet bashkëpunojnë në industrinë e mbrojtjes", tha Nufi, duke shtuar se me Kosovën bashkëpunimi përqendrohet në "prodhimin e mjeteve ushtarake".
Shefi i Shtabit të Përgjithshëm të Forcave të Armatosura, Arben Kingji, tha se stërvitjet do të zhvillohen në Kroaci dhe Shqipëri, dhe se do të marrin pjesë edhe shtete të tjera, "qoftë nga NATO, qoftë nga vende me të cilat bashkëpunojmë".
Burim: Gazeta Express
— Redaksia ZHURMA