Nota minimale 6.5 për pranim në universitete, 7.5 për mësuesi

TIRANË — Këshilli i Ministrave miratoi sot ndryshime në kriteret e notës mesatare për pranim në institucionet e arsimit të lartë. Sipas vendimit, kandidatët që aplikojnë në programet e studimit të ciklit të parë dhe programet e integruara të ciklit të dytë duhet të kenë notë mesatare minimale 6.5 nga arsimi i mesëm i lartë.

Për programet në fushën e mësuesisë vendosen kritere më të larta. Nota mesatare minimale 7.0 kërkohet për programet e ciklit të parë në mësuesinë e gjuhëve të huaja. Ndërkohë, nota 7.5 do të jetë kriter për programet e ciklit të parë që japin akses në programet master të mësuesisë.

Nota 7.5 zbatohet gjithashtu për programin e studimit që përgatit mësues për arsimin parashkollor — program ky që nuk jep akses në programet master për arsimin fillor, të mesëm të ulët dhe të mesëm të lartë. Vendimi zëvendëson shtojcat ekzistuese me një shtojcë të re, që përcakton programet ku zbatohen kriteret e veçanta.

Për zbatimin e vendimit ngarkohen Ministria e Arsimit, institucionet e arsimit të mesëm të lartë, institucionet arsimore vendore dhe institucionet e arsimit të lartë.

Burim: ATSH
— Redaksia ZHURMA