Njoftimi për marshin e 12 shtatorit shfaqet në ekranet e Tiranës
Thirrja për “Marshi për Liri” po transmetohet në kryeqytetin shqiptar, ndërsa në Prishtinë vijon numërimi mbrapsht për 16 shtatorin.
Redaksia ZHURMA · · Përditësuar · 1 min lexim
PRISHTINË — Thirrja për “Marshi për Liri”, që do të mbahet më 12 shtator në Prishtinë me moton “Kosova po pret”, tashmë është shpërndarë edhe në Tiranë. Në disa ekrane të vendosura në kryqëzimet kryesore të kryeqytetit shqiptar, ku zakonisht shfaqen reklama, prej kësaj të mërkure po transmetohet njoftimi për marshin, raporton A2 CNN.
Organizatorët u kanë bërë thirrje qytetarëve dhe përfaqësuesve politikë që t’i bashkohen aktivitetit. Ndërkohë, në Prishtinë ka nisur numërimi mbrapsht deri më 16 shtator, datë kur pritet të shpallet aktgjykimi ndaj ish-krerëve të UÇK-së në Hagë. Aktiviteti “Ora e Pritjes” është vendosur në Bulevardin “Nëna Terezë”, ku një ekran i madh numëron ditët, orët, minutat dhe sekondat deri në datën e seancës përmbyllëse.
Kjo vjen pas mbështetjes së OVL-UÇK-së për protestën e 12 shtatorit, siç u raportua më herët.
