Neuer: pensionimi është 'shumë i mundshëm' pas sezonit të ri
Ishte 85% i prirur të tërhiqej pak muaj më parë, por shpreson ta mbyllë karrierën më 5 qershor 2027, në finalen e Ligës së Kampionëve në Madrid.
MYNIH — Manuel Neuer, portieri 40-vjeçar dhe kapiteni i Bayern Munichut, u shpreh për herë të parë hapur se pensionimi i tij po afrohet seriozisht. I pyetur nga "Bild" nëse do të priste deri në fund të sezonit të ri për të vendosur mes rinovimit të kontratës ose pensionimit në verën e vitit 2027, ai u përgjigj: "këtë herë duket shumë e mundshme që t'i jap fund karrierës sime dhe të tërhiqem."
Neuer rinovoi kontratën me Bayernin edhe për një vit në maj të këtij viti, pas muajsh reflektimi ku pensionimi ishte një mundësi shumë reale. "Ndoshta në atë kohë isha 85% i prirur të tërhiqesha," tha portieri, "por të qenit pjesë e këtij ekipi, me këtë staf teknik dhe këtë trajner, më jep shumë kënaqësi."
"Pikërisht ai ambient dhe cilësia e skuadrës përbënin ato 15% që më bënë t'i thosha vetes: duhet patjetër të vazhdoj," shtoi ai. Portieri, i shpallur pesë herë më i miri në botë, thotë se vazhdon të luajë për pasionin e tij personal dhe sepse e di që ende ka aftësinë t'i shërbejë ekipit.
Për Neuerin, një përfundim ideal do të ishte fitimi i trofeut të tretë evropian. Ai shpreson ta mbyllë karrierën më 5 qershor 2027, kur finalja e Ligës së Kampionëve do të zhvillohet në stadiumin Metropolitano të Atletico Madridit. Dy të tjerët i fitoi në 2013 dhe 2020.
Neuer u nis të martën drejt kampit përgatitor të Bayernit në rajonin e Tegernsee, gati për të nisur sezonin e tij të 21-të në Bundesligë. Gjashtëmbëdhjetë prej tyre i ka kaluar me Bayern Munichun, ndërsa pesë të tjerët me Schalken.
Burim: Zëri
— Redaksia ZHURMA