Myftiu Tërnava kërkon nga Prokuroria Speciale sqarime për dokumentin “Top Secret 2”
Naim ef. Tërnava i ka drejtuar Prokurorisë Speciale kërkesë për zbardhjen e origjinës dhe autenticitetit të dokumentit të pretenduar si nxjerrë nga telefoni i Fatmir Shehollit.
Redaksia ZHURMA · · Përditësuar · 1 min lexim
Myftiu i Kosovës, Naim ef. Tërnava, përmes përfaqësuesit ligjor të Kryesisë së Bashkësisë Islame të Kosovës (BIK), ka dorëzuar një kërkesë zyrtare te Prokuroria Speciale e Republikës së Kosovës. Ajo ka për qëllim zbardhjen e plotë të çështjes së dokumentit të publikuar si “Top Secret 2”, i cili është përfshirë si dëshmimore në aktakuzën për spiunazh ndaj Fatmir Shehollit.
Në kërkesën e adresuar kryeprokurorit Blerim Isufaj, BIK-u kërkon sqarime mbi origjinën, autenticitetin, mënyrën e sigurimit dhe publikimit të materialit, si dhe rrethanat e pretenduara për nxjerrjen e tij nga telefoni i të pandehurit. Institucioni fetar njoftoi se përmbajtja e dokumentit e paraqet Bashkësinë Islame në një dritë të rreme, duke sugjeruar ndikimin e shërbimeve të huaja dhe financimin e xhamive për qëllime destabilizuese.
BIK-u e cilësoi këto pretendime si akuza të rënda që cenojnë integritetin e institucionit dhe besimtarëve. Prandaj, myftiu kërkon nga autoritetet gjyqësore të ndërmarrin veprime për eliminimin e çdo dyshimi dhe për sqarimin e plotë të së vërtetës.
