Musliu-Shoshi kritikon fjalimin e Konjufcës në OKB për Hagën

Deputetja e Partisë Demokratike të Kosovës, Ariana Musliu-Shoshi, ka kritikuar ashpër zëvendëskryeministrin Glauk Konjufca për fjalimin e tij në mbledhjen e Këshillit të Sigurimit në OKB. Sipas deputetes, Konjufca e ka trajtuar me gjuhë të zbehtë aktgjykimin prej 81 vjetësh burgim ndaj katër figurave të luftës çlirimtare.

Mbledhja e Këshillit të Sigurimit të Kombeve të Bashkuara u përmbyll me përplasje mes zëvendëskryeministrit të Kosovës, Glauk Konjufca, dhe ministrit të Jashtëm të Serbisë, Marko Gjuriq. Gjatë këtij takim zyrtar, Konjufca deklaroi se Serbia po kërcënon Kosovën, ndërsa vuri në dukje se 12 mijë civilë shqiptarë u vranë nga shteti serb. Ai gjithashtu e cilësoi sulmin në Banjskë si terrorist dhe kritikoi raportin e UNMIK-ut se pasqyron propagandën serbe.

Në reagimin e saj të publikuar në rrjetet sociale, Musliu-Shoshi tha se qasja e Konjufcës karshi vendimit të Gjykatës Speciale la shumë për të dëshiruar. Ajo theksoi se zëvendëskryeministri u mjaftua vetëm me konstatimin se aktgjykimi ka gabime në përmbajtje dhe fakte që pritet të korrigjohen në shkallën e Apelit. Deputetja shtoi se dënimi me 81 vjet burg për katër krerët e UÇK-së meritonte më shumë se një shprehje shqetësimi.

Deputetja e PDK-së vërejti se në fjalën e tij nuk u përmend me asnjë fjalë roli i Hashim Thaçit, Kadri Veselit, Jakup Krasniqit dhe Rexhep Selimit në çlirimin, pavarësinë dhe shtetndërtimin e Kosovës. Musliu-Shoshi nëvizoi se kjo qasje erdhi nga zyrtari që është caktuar të udhëheqë strategjinë shtetërore për procesin e Hagës, duke i bërë thirrje atij të përfaqësojë Republikën e Kosovës dhe historinë e saj e jo një parti apo qeveri.