Barcelona denoncon PSG-në në UEFA për koreografinë fyese të tifozëve

Barcelona ka paraqitur një ankesë zyrtare në UEFA kundër Paris Saint-Germain për shkak të një koreografie provokuese të shfaqur nga tifozët vendas në stadiumin Parc des Princes, para përballjes së Ligës së Kampionëve ku parisienët fituan me rezultat 4-2 ndaj katalunasve.

Përballja e Ligës së Kampionëve në stadiumin e klubit francez u shoqërua me tensione në tribuna menjëherë para fillimit të lojës. Ndeshja u mbyll me fitoren 4-2 të parisienëve, por vëmendja pas sfidës u zhvendos te mesazhet dhe simbole vizuale të përdorura nga mbështetësit vendas.

Klubi katalunas i raportoi delegatit të UEFA-s një koreografi gjigante në tribunën e ultrasve të PSG-së, ku paraqitej një burrë i maskuar i ngjashëm me personazhin Jason Voorhees nga seriali horror "E premtja e 13-të". Personazhi mbante një sharrë elektrike me të cilën shkatërronte stemën e Barcelonës teksa rreth saj paraqitej gjak. Pamja shoqërohej me mbishkrimin "Massacre à la parisienne", që përkthehet "Masakër në stilin parisien". Performanca u përforcua me mjete piroteknike që simulonin shkëndijat e sharrës elektrike.

Përveç kësaj koreografie, Barcelona ngriti shqetësime edhe për banera më të vegjël me shprehjen fyese "Puta Barça" dhe kërkoi heqjen e tyre nga tribunat. Klubi katalunas vuri në dyshim mënyrën se si këto materiale u futën brenda në stadium, me gjithë kontrollet e rrepta të sigurisë që zbatohen në ndeshjet e këtij niveli.

Shtëpia e futbollit evropian, UEFA, pritet të analizojë raportin e dorëzuar nga Barcelona dhe rasti mund të kalojë në procedurë disiplinore. Klubi francez PSG rrezikon të ndëshkohet me gjobë për përmbajtjen e koreografisë dhe sjelljen e disa tifozëve të tij.