Musliu kërkon hetim për kampin e Njësive Speciale

Deputetja e Partisë Demokratike të Kosovës, Ganimete Musliu, ka kërkuar një hetim të plotë dhe profesional lidhur me cenimin e sigurisë në kampin e Njësisë Speciale të Policisë së Kosovës në Vrellë. Reagimi i saj vjen pas raportimeve se një influencer i huaj kishte hyrë brenda kampit dhe kishte marrë pamje nga aty. Përmes një postimi, ajo bëri të ditur se iu drejtua zyrtarisht Drejtorit të Policisë më 17 tetor 2026 dhe se ka pranuar tashmë një përgjigje për pyetjet e adresuara. Siç raportoi Zhurma më 17-10-2026, Matt Nadin futet në tunelet e Njësive Speciale në Vrellë dhe filmon pamjet, duke depërtuar pa pengesa në këtë objekt vital.

Musliu njoftoi se Inspektorati Policor i Kosovës ka iniciuar një hetim preliminar për të sqaruar rrethanat dhe përgjegjësitë, ndërsa ajo vetë do të presë përfundimin e këtyre hetimeve. Ajo kërkoi që institucionet përkatëse të japin llogari për çdo mangësi të mundshme në garantimin e sigurisë. «Llogaridhënia institucionale nuk është zgjedhje, por detyrim», theksoi deputetja, duke kërkuar transparencë dhe publikim të gjetjeve pas përfundimit të procesit, si dhe masa për të parandaluar raste të ngjashme. Në fund, ajo falënderoi mediat për raportimin e ngjarjes dhe vënien në lëvizje të organeve përgjegjëse.