MPB heton leje drejtimi të lëshuara kundrejt ryshfetit për kategoritë “C” dhe “D”
Dyshimet për korrupsion në MPB kanë kaluar në duart e organeve kompetente, lidhur me leje drejtimi të lëshuara kundrejt ryshfetit.
Ministria e Punëve të Brendshme po heton një rast të dhënies së paligjshme të lejeve të drejtimit për kategoritë “C” dhe “D”. Dyshimet janë se lejet u jepeshin personave që nuk kishin ndjekur trajnimin apo dhënë provimin përkatës, në këmbim të ryshfetit.
Çështja tashmë është në duart e organeve kompetente. Departamenti për Kontroll të Brendshëm, Hetime Kriminalistike dhe Standarde Profesionale pranë MPB-së ka njoftuar Prokurorinë Themelore Publike kompetente dhe po bashkërendon veprimet për zbardhjen e rastit, sipas njoftimit të MPB-së për Alsat.
Një ditë më parë, LSDM-ja ngriti akuza për një skemë të dyshuar korruptive brenda MPB-së. Sipas pretendimeve të opozitës, për 1.400 euro ryshfet, persona pa trajnim dhe provim kanë përfituar leje drejtimi për kamionë dhe autobusë. Skema, sipas LSDM-së, funksiononte duke deklaruar patentën si të humbur dhe më pas regjistroheshin në mënyrë të paligjshme kategoritë shtesë.
Opozita pretendon se në këtë mënyrë janë lëshuar më shumë se 300 patenta të paligjshme dhe kërkon hetim urgjent, anulim të patentave të dyshimta dhe përgjegjësi politike nga ministri i Punëve të Brendshme, Pançe Toshkovski. Megjithatë, institucionet nuk kanë dhënë konfirmim zyrtar për shifrën e patentave apo shumën e ryshfetit. Prokuroria i ka thënë Alsat se çështja aktualisht është në kompetencë të MPB-së.