Mijëra mërgimtarë të bllokuara në kufirin Mali i Zi–Kroaci

KONAVLE — Mijëra mërgimtarë, shumica nga Kosova, u bllokuan më 2 gusht në pikën kufitare Karasoviqi–Debeli Brijeg, duke pritur deri në 28 orë për të hyrë në Kroaci. Kolona shtrihet 20 kilometra në anën e Malit të Zi, duke paralizuar edhe jetën e banorëve të Konavles.

Sipas Autoklubit Kroat, pritja zyrtare kalon 10 orë, ndërsa portaali Index.hr citon burime jozyrtare që flasin për 28 orë. Arsyet: rritje e jashtëzakonshme e trafikut tranzit, procedura të reja kufitare dhe kapacitet i kufizuar i pikës së kalimit, sipas mediave kroate.

Kryetari i Konavles, Božo Lasiq, paralajmëroi se zona është „praktikisht e paralizuar“. Policia po përpiqet të lehtësojë bllokimet, por është e kufizuar nga mungesa e korsive dhe kapaciteti i pikës së kalimit. Banorët e Konavles nuk mund të kthehen në shtëpi pas punës.

Temperaturat e larta kanë kthyer pritjen në urgjencë shëndetësore. Udhëtarët mbeten të bllokuar në vetura pa ujë të mjaftueshëm dhe pa mundësi për tualete. Komuna organizoi një kamion-cisternë me ujë të pijshëm, ndërsa Lasiq kërkoi masa urgjente dhe organizim më të mirë të trafikut.

Shtabi i Mbrojtjes Civile i Konavles u aktivizua për të menaxhuar krizën. Si alternativë, udhëtarët mund të shkojnë përmes Bosnjës dhe Hercegovinës — pikat Sitnica/Zupci dhe Ilino Brdo/Klobuk — por edhe atje janë kolona, megjithëse më të vogla. Qytetarët e Kosovës me vetëm shtetësi kosovare duhet të kenë vizë tranziti.

Alternativa tjetër është kthimi drejt Durrësit dhe trageti drejt porteve italiane Bari, Brindisi ose Ankona. Lasiq theksoi se mbrojtja e kufirit duhet të mbetet prioritet, por nuk duhet lejuar që banorët të mbeten të shkëputur nga shtëpitë e tyre për orë të tëra.

Burim: Telegrafi
— Redaksia ZHURMA