Ministria ndëshkon arkeologun Shafi Gashi — 30 për qind më pak pagë
Vendimi për zbritje të pagës prej 30 për qind për tre muaj erdhi pasi udhëheqësi i projektit të Kalasë së Prizrenit foli për mediat pa leje paraprake.
PRISHTINË — Ministria e Kulturës ka ndëshkuar me 30 për qind zbritje të pagës për tre muaj arkeologun e Institutit Arkeologjik të Kosovës, Shafi Gashi, për shkak të deklaratave të tij publike ku kritikonte mbylljen e pjesshme të Kalasë së Prizrenit dhe mungesën e investimeve shtetërore në këtë monument historik.
Procedura disiplinore ndaj arkeologut, i cili udhëhoqi projektin për funksionalizimin e Kalasë së Prizrenit, nisi më 28 prill pas një raportimi në media. Sipas vendimit, Gashit i ndalohet gjithashtu të deklarohet për media pa leje paraprake nga hierarkia, një risi kjo për të gjithë të punësuarit në këtë institut publik.
Arkeologu kishte deklaruar se ky monument kombëtar, ku u investuan mbi një milion euro, kishte mbetur pjesërisht i mbyllur për vizitorët. Gashi kishte theksuar se monumenti në të gjitha fazat asnjëherë nuk është mbyllur, duke shpërfaqur mospajtimin e tij me trajtimin që po i bëhet kësaj trashëgimie.
Burim: Gazeta Metro
— Redaksia ZHURMA
