Gjini kërkon llogari nga Qeveria për dialogun strategjik

Kryetari i Aleancës, Ardian Gjini, ka kritikuar Qeverinë e Kosovës për qasjen ndaj partnerëve ndërkombëtarë, duke kërkuar sqarime publike për trajtimin e vendit si bashkëfajtor në rajon. I ftuar në emisionin “Context” në ATV, ai e ka quajtur fatkeqësi faktin që Kosova dhe Serbia përmenden së bashku nga kancelari gjerman, ndërsa theksoi se Serbia mbetet nyja e problemeve dhe pengesa kryesore për përparimin e Ballkanit.

Gjini u shpreh se Kosova po bën gabime në raportet me aleatët dhe se partnerët ndërkombëtarë i njohin hollësisht arsyet e kësaj situate. Ai i ka bërë thirrje ekzekutivit që të tregojë arsyet e përjashtimit të vendit nga dialogu strategjik me Amerikën. «Qeveria le të tregojë pse po thonë që edhe ne i kemi fajet. Dilni, tregoni pse jemi të përjashtuar nga dialogu strategjik», u shpreh ndër të tjera ai, duke kërkuar llogari për veprimet apo mosveprimet që sipas tij po penalizojnë vendin.