Si do të zëvendësohet balancuesi në Maqedoninë e Veriut?
Bashkëkryetari i VLEN-it, Izet Mexhiti, thotë se ligji i ri për përfaqësim të drejtë zëvendëson balancuesin dhe sjell një detyrim ligjor pas 22 vitesh.
SHKUP — Bashkëkryetari i VLEN-it, Izet Mexhiti, ka deklaruar se pas 22 vitesh po sillet një zgjidhje ligjore për përfaqësimin e drejtë dhe adekuat. Gjatë një interviste për Alsat-M, Mexhiti theksoi se ky hap shndërron parimin kushtetues në ligj, ndryshe nga vegla e deritanishme e njohur si balancuesi.
Sipas kryetarit të Çairit, ky ndryshim është një avancim që kërkohet nga Bashkimi Evropian dhe përfaqëson një shtyllë kryesore të Marrëveshjes së Ohrit. Mexhiti u shpreh se ky ligj duhej të ishte sjellë që në vitin 2004, ndaj ky është momenti i fundit për ta sjellë atë.
Sipas Mexhitit, zbatimi i këtij parimi do të jetë një obligim ligjor për qeverinë. Zëvendëskryeministri i parë, përveç mbikëqyrjes dhe koordinimit të procesit, do të kërkojë që ky përfaqësim të jetë adekuat jo vetëm në aspektin kuantitativ, por edhe në atë kualitativ.
Burim: Tetova Sot
— Redaksia ZHURMA