Meghan Markle në negociata për serialin “The Gentlemen” të Guy Ritchie
Dukesha e Sussex po shqyrton rikthimin në aktrim me sezonin e tretë të serialit të Netflix, ndërsa çifti planifikon të kalojë më shumë kohë në Britani.
Meghan Markle mund të rikthehet së shpejti në aktrim, ndërsa raportohet se ajo dhe Princi Harry po shqyrtojnë mundësinë për të kaluar sërish më shumë kohë në Mbretërinë e Bashkuar, rreth gjashtë vjet pasi u larguan nga detyrat mbretërore.
https://twitter.com/THR/status/2090827988023832806
Sipas “The Hollywood Reporter”, Dukesha e Sussex ndodhet në faza të avancuara bisedimesh për t’iu bashkuar sezonit të tretë të serialit të Netflix, “The Gentlemen”, i krijuar nga regjisori britanik Guy Ritchie. Personazhi që mund të interpretojë Markle thuhet se është ende në proces shkrimi dhe nuk është prezantuar zyrtarisht, ndërsa mbetet e paqartë se në sa episode do të marrë pjesë ajo. Sezoni i dytë i serialit pritet të nisë më 3 shtator.
Markle dhe Ritchie besohet se janë njohur përmes miqve të përbashkët. Gazetarja Bronte Coy tha në emisionin “Today” të BBC Radio 4 se roli i mundshëm i Meghan mund të ketë ndikuar ndjeshëm në planet e çiftit për t’u kthyer në Britani. “Është një pjesë vërtet e madhe e enigmës”, u shpreh Coy, duke theksuar se bëhet fjalë për një rol të rëndësishëm, për të cilin Meghan është shumë e entuziazmuar.
Publiku ndërkombëtar e njohu Meghan Markle përmes personazhit të Rachel Zane në serialin “Suits”, ku ajo u shfaq për shtatë sezone. Në vitin 2017, gjatë periudhës kur ishte e fejuar me Princin Harry, Markle i dha fund karrierës së aktores për t’u angazhuar si anëtare e familjes mbretërore britanike. Një vit pas martesës, në vitin 2018, Harry dhe Meghan u tërhoqën nga detyrat si pjesëtarë aktivë të familjes mbretërore. Në vitin 2020, ata u zhvendosën në Kaliforni.
Raportimet e fundit bëjnë me dije se çifti po planifikon të rikthehet për të kaluar më shumë kohë në Mbretërinë e Bashkuar. Fëmijët e tyre, Princi Archie dhe Princesha Lilibet, thuhet se janë regjistruar në një shkollë britanike, ndërsa familja pritet të banojë në një rezidencë private jashtë Londrës. Pavarësisht këtij rikthimi, Harry dhe Meghan pritet të mbajnë edhe shtëpinë e tyre në Kaliforni.