Mediu propozon koalicion qytetar-politik dhe kandidatë të përbashkët në zgjedhje

Kryetari i Partisë Republikane, Fatmir Mediu, propozoi krijimin e një koalicioni qytetar-politik të thirrur nga studentët, pedagogët dhe protestuesit, si dhe nxjerrjen e një kandidati të përbashkët opozitar për çdo bashki në zgjedhjet lokale. Ai e bëri këtë deklaratë gjatë punimeve të Asamblesë Kombëtare të Partisë Republikane.

Në lidhje me zhvillimet e fundit, Mediu e cilësoi protestën e të rinjve si shpresën kryesore për ndryshimin e vendit. Ai u shpreh se forcat politike opozitare duhet të bashkohen me shoqërinë civile në një front të vetëm kundër qeverisë së kryeministrit Edi Rama, duke kërkuar që nisma të mos thirret nga partitë, por nga përfaqësuesit e protestës.

Propozimi i kryetarit të Partisë Republikane përfshin gjashtë pika kryesore. Së pari, ai kërkoi dorëheqjen e menjëhershme të Edi Ramës si zgjidhje për rikthimin e besimit. Së dyti, Mediu propozoi krijimin e një qeverie kujdestare me mandat kushtetues për garantimin e garës. Së treti, ai kërkoi një reformë zgjedhore me lista të hapura, ndërsa si pikë të katërt renditi reformën territoriale për autonomi lokale. Pika e pestë parashikon limitimin e mandatit të kryeministrit në vetëm dy mandate, dhe e gjashta përcakton daljen me një kandidat të përbashkët në zgjedhjet vendore.

Për sa i përket përzgjedhjes së kandidatëve lokalë, Mediu propozoi që emrat e përbashkët për çdo bashki të përcaktohen përmes sondazheve popullore të organizuara nga institute apo grupe profesionistësh. Ai tha se propozimet mund të vijnë nga Fronti Rinor dhe të gjitha partitë opozitare. Lidhur me reformën zgjedhore, kryetari i PR-së theksoi se prioritet duhet të jetë ndarja e shtetit nga krimi dhe aplikimi i listave të hapura.

Gjatë fjalës së tij, Mediu foli gjithashtu për gjendjen sociale në Shqipëri, duke deklaruar se rreth 47 për qind e shqiptarëve janë larguar nga vendi. Ai ngriti shqetësimin për rënien e lindshmërisë dhe plakjen e popullsisë, duke u shprehur se sot ka më pak lindje se njëqind vite më parë, kur Shqipëria numëronte vetëm një milion banorë. Ai shtoi se programi i Partisë Republikane do të vazhdojë të ketë në qendër familjen, pronën dhe kombin.

«Ndërtimi i një koalicioni qytetar politik të thirrur nga protestuesit, studentët, pedagogët, pa asnjë përjashtim politik, si një front i qartë kundër korrupsionit, dhunës, pabarazisë dhe qeverisë së Edi Ramës dhe me një qëllim thelbësor, zgjedhje të lira dhe të ndershme», tha Mediu.

«Ne nuk mund të bëhemi fasadë e një komisioni të reformës zgjedhore për të vazhduar axhendën e Partisë Socialiste dhe të Edi Ramës», deklaroi më tej kreu i Partisë Republikane.