FSK do të mbështesë mbrojtjen e mjedisit me personel e makineri

PRISHTINË — Ministria e Mbrojtjes dhe Ministria e Mjedisit dhe Planifikimit Hapësinor kanë nënshkruar marrëveshje mirëkuptimi për mbrojtjen e mjedisit. Ministri në detyrë i Mbrojtjes, Ejup Maqedonci, bëri të ditur se bashkëpunimi synon garantimin e një ambienti të sigurt dhe të pastër.

Përmes kësaj marrëveshjeje, Forca e Sigurisë së Kosovës (FSK) do të mbështesë aksionet shtetërore me personel, makineri dhe kapacitete logjistike. Maqedonci theksoi se mbrojtja e mjedisit është përgjegjësi shtetërore që kërkon angazhim të përbashkët.

Sipas Maqedoncit, institucionet e Kosovës përmes këtij partneriteti dëshmojnë se veprojnë të bashkuara për të mbrojtur hapësirat publike, për të rritur sigurinë mjedisore dhe për t'u ofruar qytetarëve një vend më të pastër për të jetuar.

Burim: Lajmi.net
— Redaksia ZHURMA