Zubin Potok: gjenden mbetje të reja mortore te Kalludër e Vogël
Gërmimet vazhdojnë për të katërtën ditë; dyshohet varrezë masive me eshtrat e "intelektualëve nga Mitrovica", zhdukur që nga 19 prilli 1999.
ZUBIN POTOK — Në fshatin Kalludër e Vogël janë gjetur mbetje të tjera mortore gjatë gërmimeve që po zhvillohen për të katërtën ditë me radhë, në kërkim të një varreze të dyshuar masive nga lufta e fundit në Kosovë. Mbetjet u zbuluan gjatë punimeve të së enjtes, bëjnë të ditur burime të KosovaPress.
Sipas dyshimeve fillestare, në këtë lokacion mund të jenë mbetjet e grupit të njohur si "intelektualët nga Mitrovica", të zhdukur që nga 19 prilli i vitit 1999. Identifikimi i tyre përfundimtar do të bëhet vetëm pas ekzaminimeve mjeko-ligjore dhe analizave të ADN-së, pasi të përfundojnë procedurat e zhvarrimit.
Vendin e gërmimeve e vizitoi të enjten kryeprokurori i Prokurorisë Speciale, Blerim Isufaj, i cili konfirmoi se mbetjet e gjetura deri më tani kanë origjinë njerëzore. Isufaj tha se identifikimi është procedurë që kërkon kohë dhe kujdes sipas standardeve mjeko-ligjore, dhe kërkoi kujdes nga institucionet me deklaratat publike, pasi informacioni i pakonfirmuar mund të dëmtojë hetimin.
Gërmimet në këtë lokacion filluan të martën dhe po kryhen nga ekipe të Institutit të Mjekësisë Ligjore, Policia e Kosovës dhe institucione të tjera kompetente, nën mbikëqyrjen e Prokurorisë Speciale. Procesi i kërkimit pritet të vazhdojë edhe në ditët në vijim, deri në përfundimin e të gjitha procedurave të nevojshme.
Burim: Lajmi.net
— Redaksia ZHURMA