Mateu Boçi fitoj medaljen e artë në Kampionatin Europian të Shahut

Shahisti Mateu Boçi, vetëm 16 vjeç, është shpallur kampion Europe në shah për grupmoshën U16, në aktivitetin e zhvilluar nga 4 deri më 12 nëntor në Hersonissos të Kretës në Greqi, duke fituar medaljen e artë dhe duke shënuar një sukses për shahun shqiptar. Sportisti i ri përfaqëson Klubin Sportiv Tirana dhe mban titullin Mjeshtër FIDE, ndërsa më parë ka fituar edhe tituj kombëtarë në këtë disiplinë.

Kampionati Evropian i Shahut për Të Rinj 2026 përfshiu grupmoshat U8, U10, U12, U14, U16 dhe U18, ku Boçi u përball me shahistët më të mirë evropianë të kategorisë së tij për të siguruar vendin e parë. Federata Shqiptare e Shahut njoftoi suksesin e të riut shqiptar dhe uroi kampionin, trajnerin e tij personal Kristaq Andoni, si dhe familjen e tij, duke vlerësuar punën dhe sakrificat që qëndrojnë pas këtij triumfi në njërën prej garave më të rëndësishme të kontinentit për moshat e reja.

Kryeministri Edi Rama ka ndarë lajmin e suksesit përmes një postimi, ku ka përgëzuar shahistin e ri dhe e ka cilësuar arritjen si një lajm të bukur për shahun shqiptar me fjalët «RESPEKT! Një lajm i bukur për shahun shqiptar». Gjatë një vizite të mëparshme në ambientet e reja të Federatës Shqiptare të Shahut në Tiranë, kryeministri njoftoi se qeveria do të vendosë një buxhet të veçantë për zgjerimin e shahut në shkollat e vendit, pasi kjo disiplinë është futur tashmë në shkolla që nga viti i kaluar dhe synohet të shtrihet në sa më shumë institucione arsimore si ushtrim i shëndetshëm për mendjen e fëmijëve.