Madonna debuton albumin 'Confessions II' në vendin e parë të Billboard 200

Madonna ka bërë një rikthim spektakolar në krye të klasifikimeve muzikore amerikane, duke konfirmuar edhe një herë statusin e saj si 'mbretëresha e popit'. Albumi i saj i ri, 'Confessions II', i publikuar më 3 korrik nga Warner Records, ka debutuar në vendin e parë të listës Billboard 200, duke u bërë albumi i 10-të i artistes që arrin majën e kësaj liste ikonike.

Ky sukses vjen pas një pritjeje shtatëvjeçare nga fansat dhe e rikthen Madonnën në qendër të vëmendjes së industrisë muzikore. Këngëtarja, fituese e shtatë çmimeve Grammy, ndau në Instagram momente nga festa e organizuar në Queens, Nju Jork, më 11 korrik, një natë para debutimit zyrtar të albumit në krye të Billboard.

Në festë ishin të pranishëm edhe bashkëpunëtorët e saj, përfshirë producentin Stuart Price, si dhe artistët Honey Dijon dhe Kaytranada. 'Fjalët nuk mund ta shprehin sa mirënjohëse dhe e befasuar jam nga pritja e jashtëzakonshme që ka marrë 'Confessions on a Dance Floor'', shkroi Madonna, duke iu referuar albumit të ri si vazhdim i projektit të saj legjendar të vitit 2005.

Ajo falënderoi fansat dhe të gjithë bashkëpunëtorët që ndihmuan në realizimin e këtij projekti. 'Sidomos fansat e mi. Vullneti i mirë dhe pozitiviteti janë të pabesueshëm. Ende po e pickoj veten. Nuk mund ta besoj që ai është numri 1 në të gjithë botën', u shpreh këngëtarja.

Madonna tha gjithashtu se qëllimi i saj ishte t'i sillte njerëzve energji dhe gëzim përmes muzikës. 'Ëndrra ime ishte ta bëja botën të kërcejë këtë verë. T'u sjell gëzim njerëzve. Ëndrrat bëhen realitet', shkroi ajo.

'Confessions II' është albumi i 15-të në karrierën e artistes dhe përmban 16 këngë. Publikimi i tij u shoqërua edhe me filmin e shkurtër 'Confessions II – The Film', i cili u shfaq për herë të parë në qershor në Festivalin e Filmit Tribeca.

Me këtë sukses të ri, Madonna vendos një tjetër rekord në historinë e muzikës: ajo bëhet artistja e vetme që ka pasur një album në vendin e parë në pesë dekada të ndryshme, nga vitet 1980 deri në vitet 2020. Në të njëjtën kohë, ajo barazohet me grupin legjendar The Beatles si artistja me 10 albume që kanë arritur vendin e parë si në SHBA ashtu edhe në Mbretërinë e Bashkuar.

Burim: BalkanWeb, https://www.balkanweb.com/madonna-rikthehet-ne-maje-te-billboard-mbreteresha-e-popit-shkruan-serish-histori/